سؤال عن فريون المكيف

صارت معنا فى افالون زود الفريون كان ناقص وضبط الحمدلله مع العلم هذا الكلام قبل تقريبا 3 سنوات والحمدلله لحد الان ممتاز 
جرب رح لمحل وخله يقوس بساعه اذا ناقص زوده وان شاءالله يضبط 

مشكور اخوي K 6 4 I على المداخلة هو اذا زاده بأذن الله يبرد لانهم قالو لي تعبئة فاريون لاكن اخاف فتره ويرجع يحتر
انا الي محيرني اني معبيه قبل 11 شهر تقريبا والفريون الي قبله حق بلدها ما قد غيرته الا هاذي المره

اتوقع
اذا عندك جهه بارد وجهه حار هاذي من قسام اللي في الطبلون
لان الفريون ماله دخل مادام فيه بروده يعني الفريون سليم

اهم شي شوف قياس ضغط الفريون اذا تمام
بعدين تأكد من الثلاجه وفتحات الطبلون

شوف المواصير اذا عليها ثلج معناتها عندك زياده فريون او نقص او سدد
الطبيعي تكون المواصير بدون ثلج بس بارده

بارك الله فيك اخوي التبريد قل من الجهتين لاكن جهت الراكب ابرد بشوي وعلى كلام اصحاب الورش الي رحتلهم قالو تعبئة فريون وكشفو على والمواصير مافيها تنسيم والحمدالله كيف اتأكد من الثلاجة اذا فيها تنسيم او لا؟

مادام التبريد ضعيف معناتها فريون ناقص
ليه جهة الراكب أبرد لانها قريبه من الثلاجه
اهم شي أبحث عن التنسيم لان الفريون يدوم أكثر من ٣ سنوات
اضغط المواصير هوا ضغط عالي وشوف اذا نقص معناتها في تنسيم
اذا المواصير سليمه فيه جلده او ربله صغيره مثل الصاموله مكانها في نهاية المواصير عند الطبلون من برا
كانت تهرب عندي غيرتها وراح التهريب ماتكلف كثير
الافضل انك تغير راديتر المكيف لان القديم فيه ترسبات وكفائته اقل

الله يجزاك خير اخوي ماقصرت كفيت و وفيت بأذن الله بكره بدور مهندس يكون فاهم في المكيفات وبخليه يضغط المواصير بالهواء
للتأكد وبحاول اغير الرديتر اذا عند الوكاله رخيص
بس لو لا قدر الله التنسيم في الثلاجة كيف اعرف بضغط الهواء

اذا ضغطتها هوا يبين معك التنسيم
يبحث عن التنسيم ويلقاه
الثلاجه صعب لانه بعض السيارات لازم يفك الطبلون ونادر تخرب

المشكلة اكثر العمالة بس يشوف التبريد على طول يقولك ثلاجة الله يعننا ونلقى مهندس يخاف الله ما قصرت بيض الله وجهك

الله يسهل امرك
ويرزقك بالمهندس الفاهم

بارد من جهة وحار من جهة اذا متأكد انك حاط الجهتين بارد يعني عندك الفريون ناقص
التنسيم اكثر شي صعب كشفه لانك تتعب عشان تعرف فين التهريب عندك اكثر من مكان
عندك مداخل الكمبروسر الليات القسام الي من داخل الكبوت للثلاجة ،القسام الي من عند الثلاجة للكبوت ،الثلاجة نفسها الرديتر الخارجي يعني حفلة يبغالها جلسة وتجيب فيري وصابون وتفرغ الفريون وتكبسها هواء وتقعد تحاول تطلع الخلل
الان الي تسويه كالتالي لا تضغط هواء ولا اي شي عبي فريون عادي جدا وطلع جوالك وصور ساعة الضغط وشوف كم عبى لك وبعد شهر ارجع لنفس المحل وخليه يشبك لك الساعة وشوف كم الفريون واصل اذا كان قل الضغط شي بسيط يعني ان شاء الله يمديك تتدارك الوضع وتروح تشتري الابرة (مانع تهريب الفريون) وتكمل الفريون الناقص وان شاء الله تنسى القروشة اما اذا كان التهريب قوي هنا اقعد افحص وشيك وشوف التهريب فين
بخصوص الفريون عندك الجنترون ويجي بعده الrip وبعدها الفريون الكندي وبعدها يجي النوع الهندي وبعده الصيني وكلها كويسه ولكن خليك على الجنترون(honeywell) وابحث في الانترنت عن صوره عشان تعرف الفرق سعر التعبئة ان كثر 150 وان كنت شاطر تعبي ب 100 الاسطوانه سعرها 470 وتعبي فوق ال 7 سيارات

الله يعينك والاخوان ماقصرو

في طريقة لكشف التهريبات في بعض الورش يحقن مادة مع الفريون وبعد مايخف الفريون (بعد كم اسبوع او شهر ) ترجع عندهم يفحص بمسدس ليزر ويبين معاه مكان التهريب
سويتها بسيارتي القديمة كنت بغير الثلاجة وطلع في الاخر الجلد الي بين المواصير

الله يعطيكم العافية يا رجال ماقصرتو بيض الله وجيهكم اليوم سويت كشف اخير والحمدالله المواصير مافيها تنسيم وعبيت فريون اصلي الجنترون مثل
ماقل اخونا مشعل
والمهندس قالي اذا حسيت ان التبريد قل تعالي واكشف على الثلاجة
ان شاء الله ان الثلاجة سليمه

salehhd

ايش اسم الطريقة هذي في الورش ..؟؟