افضل مركز صيانة لكزس امريكي بالرياض

يا حبيبي اي شي خارج عن الكهرب و المكانيكا بالقير والمكينه سوه باي محل

واذا تبي نصيحتي روح العضيب لكزس بس تراه غالي بس شغل نظيف

واذا تبي اعطيك ورش اكثر اعطيك

الصناعية القديمة

سجل عندك :

العضيب لكزس متخصص لكزس وغالي

جبرو لكزس متخصص لكزس وغالي بس ارخص من العضيب

مقابل له ميزان اليرموك يشتغل شغل نظيف بالرمان والعكوس

او ميزان المجد او ميزان البلاد ميزان البلاد غالي

ولا تنساني من دعواتك بالشهر الفضيل كان معي لكزس وكنت اصلح عند جبرو بس للاسف ماعاد يدخل القديم

ونصيحة اي شغل مكانيكا او كهرب خله يفحص الخلل بالكمبيوتر فحص ب ٢٠٠ ريال يطلع كل مشاكلك

بس انتبه ترى كلامي عن لكزس قديم

واذا تبي بصناعية العاصمة سجل برضه فن التقنية لصيانة السيارات يجي بزاوية ومتخصص لكزس ويجيب من التشليح وغالي كذلك

بس اسعارهم اكيد ارخص من الوكالة

لاتنسى تسجل الاسماء بقوقل ماب حتى تخزن وتحفظ المكان هناك لو احتجتها

العضيب لكزس...
ف الصناعيه القديمه مخرج ١٧
صيانه.. وقطع غيار..
ممتاز شغلهم... الاسعار نوعا ما
مر عليهم وان شا الله تحصل اللي تبيه
الموقع - - - > على قوقل ماب

اهرب عن العضيب ويوفقك الله
لا يغرك متخصص لكزس .. ترا ال Es ماهي معقدة 
مثلها مثل الافالون 
ورمان الكفر اطرف ورشة يبدله لك ب ٢٠٠ ريال بالكثير
والقطع حط رقم هيكلك في موقع افيال 
واختار الرمان والجهة يمين او يسار 
امام او خلف 
وسجل رقم القطعة عندك وادخل اي محل قطع
وقل له عطني رقم القطعة بالضبط 
واذا سالك قل له افالون تويوتا

لا خلى ولا عدم يالربع ماقصرتو والله