أضف سؤال أو موضوع جديد          

مشكلتي مع ورشة خرب علي السياره واحتاج المشوره

up 18 down 0
alokhalid 60
قبل سنه و 6 شهر



بسم الله الرحمن الرحيم السلام عليكم ورحمة الله وبركاته هذا أول موضوع لي لذلك لا يوجد لدي لايكات كثير مشكلتي التي احتاج فيها للمشورة انه حصل عندي تهريب في زيت المكينة واستمر معي حوالي سنه أشيك عليه وأزوده إذا نقص واللي صار يا إخواني إني طفشت لان التهريب زاد وأصبح علبه كل أسبوع وفي الأخير قررت أصلحها المهم إني لفيت على أكثر من ورشه وكلهم قالو لي لازم نفك المكينة ونغير الصوف والوجيه وفي الأخير حطيتها عند ورشه وثقت فيها لان اسمها معروف. المهم اتفقت معه على شغل يد 1600 ريال شغل يد وجلست السياره عندهم حوالي اسبوعين كل ما مريتهم قالو زي منت شايف شغالين والسياره ما خلصت وفي النهايه اتصلو علي وقالو تعال استلم السياره قلت اوكي ورحت حاسبتهم ب 3600 تقريبا مع قطع الغيار وليتني ما حاسبتهم لاني شفت الزيت ينقط تحت السياره وهي عندهم قبل اطلع بها قلت لهم عنها وكشفو عليها مره ثانيه وقالو هذا من حساس الزيت نسينا نغيره لاكن انتظر شوي نفكه ونغيره ما ياخذ وقت وزعلت عليهم لاني اكتشفت ان فكة المكينه والمصاريف اللي دفعتها ما كان لها داعي وكانت خطا منهم في تشخيص العطل وقلت بيني وبين نفسي ليتني مغسل السياره بستم وموديها لهم عشان يبين مكان التهريب. لاحظت في السياره ايضا ان المكينه فيها رجه خفيفه وقالو لي انك بعد ما تمشي بالسياره تصفى معك وتضبط وصدقتهم لاني طفشت اسبوعين مستاجر سياره. اخذت السياره في الليل وداومت عليها من بكره وانا راجع من الدوام طفت معي السياره واصبحت تدق سلف وما تتحرك المكينه. سحبتها بسطحه ورجعتها لهم وحاولو يشغلونها وما اشتغلت وقالو لي خلها عندنا نكشف عليها ونشوف. رحت واتصلت عليهم بعدها بساعة تقريبا وقالو ان المشكله من سير التايمن انقطع مع انهم مركبينه لي جديد واول ما سمعت هالكلام واروح وقالو وان المشكله بسيطه واننا بنغير السير ونخرط الراس لانه تضرر من قطع سير التايمن وقلت لهم ترا خلاص ريال واحد معاد فيه وبتصلحون السياره على حسابكم وبتضمنونها لي قالو خلاص اوكي. قال لي صاحب الورشه ان اللي تضرر راس واحد فقط ويحتاج مخرطه علما بان المكينه فيها راسين والراس الثاني في السياره ما تضرر لذلك ما يحتاج خرط... وانا خايف يلعبون في السياره ويصلحونها باقل التكاليف. السؤال : 1. هل خرط راس واحد فقط في المكينه يكفي يعني ما منه ضرر على المدى الطويل؟ 2. هل فيه جهة اروح لهم اشتكي على الورشه ويرجعون لي الفلوس اللي دفعتها ؟ اعتذر على كثرة الكلام لاكني فعلا مغبون لان السياره لها معي اكثر من 10 سنوات تمشي معي ممتازه وحتى يوم اوديها للورشه ما كان فيها شي الا التهريب فقط علما بأن السياره لكزس 400 موديل 98







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


الله يعينك ياصاحب الموضوع كنت اتمنى تمر اكثر من ورشه صار الاستغلال الاكبر الان من اصحاب الاسماء لانهم انكشفو فلما يجيهم احد يبون يعصرونه عصر ويمكن المشكله ماتسوى. انا من رأي ترفع شكوى لوزاره التجاره وتقول لهم بالتفصيل وش صار وممكن هم يوجهونك للجهه الصحيحه قبل تروح الورشه
بالتوفيق للجميع


up 0 down 0
midnight_963 544
قبل سنه و 6 شهر



امس.   طفا الفورد.  ومن خلال تصفحي.  طلع اما من حساس الكرنك او طرنبة البنزين.     شلته بسطحه
وسبحان الله.     تذكرت ان فيه ورشة قالت العوامه ماتقرا صح.  طالعت في الانبير حق البنزين على النص.  نزل تحت قال طرنبة بنزين
قلت لحظه.    لاتسوي شي ومن زين الحظ. قريب منه محطه رحت على رجلي وعبيت ب ٦ ريال معي جالون ودبة مويه.  فللتهن احمر
ورجعت وصبيت البنزين واشتغلت.    قلت شكرا.  وطلعتها من الورشه وففلتها ب ٥٩ ريال. كان فاضيه مره
وخسرت فقط. ٦٠ قيمة سطحه.     سبحان الله كان بيفكها. واخسر قيمة طرنبة و ١٥٠ شغل يد 
عاد مدري هو على نيته والا بياخذ الطرنبه يبيعها.     ماعاد احسن الظن


up 1 down 0
عبدالله الشفيعي 1428
قبل سنه و 6 شهر