غاز النتروجين في الكفرات - معلومه من بنغالي

6 1

لايمكنك التصويت حتى الحصول على 20 نقطة على الأقل
إضغط هنا للإخفاء

ملك الخطوط 235
قبل 10 سنه و 6 شهر

السلام عليكم
صبااااااااااح الخيييير على الجميع
البارحه يوم الخلايق نياما
اقصد البارحه مريت محل بنشر فيه بنغالي
وكنت بزود الكفرات
المهم كل كفر ناقص شوي
يعني في كفر 31
وفي كفر 25
وفي كفر 33
المهم قلت بوزنها كلها
وللمعلوميه كفراتي كلها معباه نتروجين
المهم جيت للبنغالي وقلتله كم تزود نتروجين لكل الكفرات
قالي عشرين ريال
المهم البنغالي هنا بدا يتفلسف علي ويتكلم عن النتروجين ووجوده بالهواء الطلق
ونسبته حسب ما قالي 70 بالميه موجوده بالطبقه الي فوق للهواء
وبدون النتروجين الانسان يتعب ويموت حتى السمك يحتاج نتروجين المهم معلومات ما ادري عنها صراحه لكن من كثر فلسفته وذكره لفوائد النتروجين كنت بخليه يعبيني انا نتروجين
المهم صاحبنا بعد المحاضره الطويله
ختم كلامه اخر حاجه وسألني بكبرياء
انت كم لك والنتروجين بكفراتك
قلتله يمكن سنه ونص من عبيتها
قالي كذا غلط قلتله ليه ؟
قالي النتروجين لازم كل ست شهور تغييره
طبعا اول ما قالي هالكلام انا جاء على بالي انه يبي فلوووس وقلت الحين بيقولي بيفضي لي الهواء النتروجين القديم الي بكفراتي وبيعبي نتروجين جديد وبيقولي هات مية ريال
قلتله انا يا صديق انا سنه ونص كفرات كويس مافي مشاكل وهواء جوا كويس
المهم هو بدا بالانفعال وقالي انا عشره سنه شغل كفرات انا ملعوم لازم نتروجين كل ست شهر سوي فضي بعدين عبي نتروجين جديد
المهم حسيت انه بيصفقني بالعيار الي بيده
قلتله خلاص كم تبي بس وتفضي وتعبي جديد بس تفكني من قرقك
هنا انا فطست قالي 30 ريال قلتله يعني عشره ريال زياده ؟
قالي ايوه قلتله يالله غيره دامها زياده عشره ريال وبيغيره كله
المهم فضى الكفرات الاربعه كفر كفر
وطيح السياره على جنوطها وعبى نتروجين جديد
الملاحظه بعد التعبئه الجديده اللهم السياره ارتفعت شوي عن الارض والسبب ان الهواء كان عندي ناقص شوي من اول وهذا الي خلاني اروحله واوزن هواء الكفرات
اما الباقي ولا في شي جديد
الموضوع يسألكم وش رايكم بكلام البنغالي
هل فعلا النتروجين لازم كل ست شهور يتغير بجديد ؟
لاني انا ما اقتنعت بكلامه ابداااا
خصوصا ان النتروجين القديم له بكفراتي سنه ونص ما سويت له شي وماشيه اموره تمام يعني عن تجربه
بس اللهم نقص شي بسيط وتحليلي لكلامه انه يبي فلوس من العالم
ويبي يخف على الشعب بكلامه وفلسفته يعني كل زبون اتوقع يعيدله نفس الكلام الي قاله لي
والزبون يعطيه 30 ولو خمس زباين باليوم 150 ريال بجيبه
وللعلم : انا ما كنت بخليه يفضي الهواء القديم ويعبي من جديد الا بسبب انه كان بياخذ علي عشرين ريال على زياده هواء بسيطه فقلت ازيد عشره واغيره كامل مرره
وفي نقطه ما اعجبتني بطريقته هو انه يفضي كل كفر الين الاخير فينزل الكفر مرره ويصير الجنط ضاغط على الكفر وينعفط الكفر من تحت وكانه بيتشقق زي الصوره الاخيره تحت بس طبعا هو ما فضاها كلها بوقت واحد
كل كفر يفضيه لحاله بعدين يعبيه ويبدا بالثاني لكن
مع ذلك ما ارتحت لما شفت الكفر طايح مرره وثقل السياره ضاغط على الكفر وهو منسم
شاركونا برايكم في الموضوع

إبلاغ

الردود