تفضلو جميعا - من تصدق من الورش - نقاش عام
3
3
إضغط هنا للإخفاء
السلام عليكم
هلا بالطيبين يا مرحباااا
عندي موضوع مزعجني بالووورش
<<<< يا كثر مشاكله مع الورش
الموضوع يتكرر علي كثيررر مرره
وفي أي مشكله تواجهني بالسياره
انا ذكرت الموضوع اليوم لاني قبل امس سمعت صوت طقطقه اسفل السياره وانا المساعدات عندي اصلا منتهيه وشاك ان الصوت منها المهم قلت بسمع كلام الشباب وما راح اروح ورشه وحده
بمر اكثر من ورشه عشان اتأكد
المهم رحت الورشه الاولى قالي عندك المساعد اليمين مفقووع والمساعد اليسار مطعوج
قلتله اوك برجعلك ومشيت من عنده رحت ورشه ثانيه كشف على السياره تتوقعون وش قال ؟
قالي مساعداتك سليمه مافيها شي ههههههههههه
والله انهبلت
قلت مشكور ورحت ورشه ثالثه قالي المساعد الي على اليمين رايح فيها مرره لازم تغيرره قلتله واليسار ؟ قالي يمشيك
المهم اني سحبت عليهم كلهم ورحت البيت
طبعا انا ذكرت هذه اخر قصه صارت لي
وهي مثال لكثير من المشاكل الي اواجهها بنفس هذه الطريقه
يعني برضو قبل فتره سيارتي ما كان فيها أي حاجه
وكنت فاضي قلت خلني اروح افحصها
دام الفحص مجانا هههه
المهم دخلت اول ورشه
للمعلوميه سيارتي ما كانت تشتكي من شي
اول ورشه قالي عندك كراسي المكينه والقير كلها يبيلها تغيير قلتله يا رجال ؟ قالي ايه الكراسي منعدمه عندك
قلتله انا ما حسيت بشي
قالي خلاص روح وقف على المكينه وهو ركب السياره وبدا يعشق القير قدام وريوس طبعا انا شفت المكينه زي الي تهتز قدام وورا قلته ايوه قالي لازم تغيرها
قلتله وايش ثاني
نزل تحت السياره قالي عندك الاذرعه ومسمار التوازن وجلد التوازن المهم قلتله بمرك بعدين والله وسحبت عليه شهرين والحمدلله موتري مافيه شي
وانا ما ادري اذا هو صادق او كذاب
بس ما تتوقعون معي ان بعض الورش صار عندهم نصب بهالامور
واحد يودي موتره يفحصها يطلعلوه مية خراب
يمكن يكون صادق
بس المشكله لو رحت ورشه ثانيه يمكن يكذب الي قبله ويطلعلك خرابات ثانيه
وانت تضيع بينهم
انا الصراحه مقتنع بكلام الكثير وان لازم تروح اكثر من ورشه تفحص
لكن المصيبه ان
الورش يكذب بعضهم بعضا <<<<< متعوب عليها
يعني يا انهم يستهبلون او يستخفون دمهم
والله اني فطست ضحك يوم واحد يقولي المساعد منتهي والثاني يقولي مافيه شي ؟
شي يقهر
تنحلس ما تدري تغييره او لا
لان مثل هالامور انت تعرفون انها لو كانت في بداية الخرابات وغيرتها او صلحتها تتفادى مشاكل ثانيه
يعني اصلح المساعد عشان ما تخرب كراسي المساعدات او المقصات
يعني زي ما يقولون خراب يجر خراب
وصلح الخراب الاول عشان بعدين ما يصير خرابين
وش رايكم بهالكلام جميعا ؟
وهل صارت لواحد منكم ؟
وكيف تصرف بهالحاله ؟
لما تمر اكثر من ورشه وكل واحد يطلعلك عله بسيارتك وبعضهم يكذب بعض
وش رايكم بمقولة واحد من الشباب يقولي مع العماله الفاشله الي هنا جر الموتر لين يطفى عليك بنص الشارع بعدين حمله بسطحه ورح خلهم يصلحونه لك
يعني كان قصده لان اغلبهم حراميه وما عندهم احترافيه ومهنيه بصيانة السيارات
وبالنسبه للي يقولي اتعامل مع ورشه وحده وخلك معه
هذه مشكله تعبت فيها اكثر
لاني زمان كنت نفس الطريقه تعاملت مع بعض الورشه فتره طويله
وجتني مشاكل مقرفه
واتوقع الجميع يلاحظها
لما تتعامل مع ورشه معينه
خلاص يصير راعي الوشه متأكد انك مستحيل تصلح الا عنده وما راح تثق الا فيه وانه احسن واحد في العالم
فيبدا يمارس عليك تسلطه
يعني لما تودي السياره عنده يقولك وقفها وتعال بكره بصلحها لك
ويتصل عليك ويعطيك الاسعار الخياليه وانت تقوله ليش غالي يقولك انا بشتغلك شغل نظيف
وهو الكلب واثق انك ما راح تروح عند غيره وانك غشيم ما تدري وانت فعلا ما تعرف كم قيمة اصلاح بعض الاشياء
يعني يصير هو حاطك بجيبه يلعب فيك على كيفه
انا بعد ما تكررت على هالمواقف سحبت على مقوله لازم تتعامل مع ورشه وحده
ونفس مشاكل بداية الموضوع
اترك السياره عنده ولا حتى لو انا عنده يقولي بغيرلك وبصلحك وبسويلك وبخرطلك المهم اخر شي يصفقلي القطع الي غيرها بزاوبه الورشه ويقولي غيرنالك هذه كلها
اقوله معقوله هذا كله طلع من موتري خربان يقولي وهو رافع خشمه اكييييد
واذا كثرت مع سئله يبدا يسوي نفسه زعلان ومعصب زي الي كان مافي الا هو بالصناعيه
والله صارتلي كثير ومع ورشه مشهوره ومعروفه عشان كذا سحبت عليهم والصراحه بعد ما سحبت عليهم ارتحت نفسيا حسيت ان انا الي اتحكم فيهم مو هم الي يتحكمون بس واجهتني المشكله الي في بداية الموضوع
الي هي كل واحد يقولك كلام ما تدري تصدق مين وتكذب مين
إبلاغ
الردود
1
0
1
1
مره رحت لورشه اخر الشهر فاضي والجيب عامر ولله الحمد وكنت اسمع اصوات لما اضرب مطب وخاصة لاجاني مطب كبير وضربته على سرعه احس ان المساعديات تبي تطلع من الكبوت صوت مزعج وقوي والسياره اي مطب يجيها تقوم تلعب يعني اليايات تحس انها دمرانه قلت خلني اوديه الصناعيه واول شارع واحصله ذولاك اليمانيه جالسين من الطفش واثنين نايمين واثنين قاعدين يتهاوشون المهم وقفت عندهم سلام عليكم بالله يابوعلي شيكلي على المساعديات واليايات والمقصات والاذرعه قاله هاتها للحفره وقفتها بالحفره ونزل ابو يمن وقال عندك المساعديات كلها متفقعه قلت كيف قال تعال شف الزيت طالع منها قلت اي والله اوكي نبي نغير هذي قال اليايات كويسه مايبيلها تغيير قلت حلو وقال يبيلك مسامير توازن 2 قلت اوكي وغيره قال يبيلك قماشات وخرط هوبات قلت يالله المهم جبتله كل القطع وركبها وبعدها بكم يوم جربت الموتر والله ماكني ركبت فيه اي شي غبنه خذا مني حول 1500 ريال وماستفدت شي وبالنهايه حسبي الله عليهم وعسى الله لايوفقهم لابالدنيا ولا بالاخره هالنصابين
1
0
والله نفس الي صارلي بس بخرابات ثانيه وللاسف تتكرر كثير ذكرتني بمره رحت اصلح الكلتش حق سياره لي قديمه المهم وصلت عند واحد باكستاني قالي بنغيرلك العلب وما ادري ايش والله ناسي
المهم انه سوا كل الي براسه
يوم خلص طلعت على السياره اشوف نفس المشكله موجوده
اقوله ما راحت المشكله الاساسيه الي جيتك عشانها
قالي : انا صلحلتك اشياء خربانه كانت عندك
طيب يا ابن الذينا انا قلتلك صلح حاجه ثانيه ؟
وربي ما تقدر تتفاهم معاهم ولا تقدر تاخذ منهم حق
انا هذه اسميها سرقه مبطنه
بس برايك وش الحلول ؟
انا يمكن قبل فتره ذكرت قصتي مع ورشه رحت عنده وصلحت حاجه وبعد عشر ايام رجعت نفس المشكله ودفعت للسوري الف ريال
رجعتله للورشه وقلتله عطيتك الف عشان تصلحها عشره ايام بس تعرف وش قالي ؟
والله على ما اقول شهيد
قالي انا اشوفها صالحه وانتا تشوفها خربانه لا تزود الحكي
سكر تمك ورروح جيب الشرررطه لي
يعني قمة الاستهتار
والله غبنه بقوووه وغيره من المواقف كثييير
وترا مو انا وانت كثير من الناس تجيهم هالمواقف وكنت اشوفها بعيني
لكن بقولك حاجه قالها لي واحد
دام ان الورش هذا وضعها وفي اهمال عليها من المسؤولين لا تودي سيارتك عندهم الا اذا شفت المشكله زادت بقووه
يعني ما ينفع تودي سيارتك والمشكله توها باديه لانهم بيبدون يفتون وكل واحد يقولك شي وانت تضيع بينهم
والله وانا قاعد باحدى الورش اشوف سيارات داخله طالعه من عنده والفلوس الي يدفعونها الزباين اقل واحد يدفع 500 ريال هذا حق شغل ابو ساعه وزبون ثاني يدفع الف ريال هذا شغل ابو ساعتين قاعدين على السياره
يعني لو فرضنا باليوم اقل تقدير صلح عشر سيارات اقل شي دخله باليوم سبع الاف
طبعا انا اتكلم عن الورش المعروف الي زباينها داخله طالعه
وشغله مش حالك
الحين سمعت من وزارة التجاره في حملة سووها لا تسأل بكم
الي هي حق توحيد الاسعار
طبقوها في كثير من المحلات التجاريه
ما ادري ليه ما يطبقونها بالورش يعني كل محل تصير في لوحه برا
تغيير مساعد واحد ب 100 ريال
تغيير فحمات ب 60 ريال
تغيير بواجي مية ريال
وزي كذا
والموضوع سبق وتكلمت فيه بكلام كثيررر ويكون ايضا في مكتب بكل صناعيه الواحد يرجعه ااذا انضحك عليه ويقاضي صاحب الورشه ويرجعله كل دراهمه
يعني زي قصتك الي صارتلك انت يكون عندك فاتوره مذكور فيها ان جيت للورشه تبي تصلح خراب معين وتذكره بالتفصيل بالفاتوره بحيث لو ما صلحه الورشه تروح المكتب ويطالبون راعي الورشه يرجع لك ال 1500 ريال كلها لك مع تعويض اذا ثبت انهم سببو خراب ثاني
كذا تمشي البلد صح والكل ما يفتي من راسه الا بعلم
1
1
لكن ربك يعين
ولايك
1
0
الحين السؤال : ليه الواحد يروح لاكثر من ورشه ؟؟
طيب انا ابجاوبك
عشان الاشياء الي قالوها تثبت
مثلا
انت قالو لك اثنين ان المساعد يمين خربان صح ؟
اجل اكتب عندك " مساعد يمين = 2" عدد الي اثبتو ذا الشي
و في بعض الناس تروح للورش و هي تسمع اصوات
مثل اخونا "ابو راما" يقول انه يسمع الاصوات اذا رقى مطب
(( هذي فيها احتملااااااااااااات كثيييييييييره مـــــــتـــــــــــحيل المكانيكي يكتشفها بالنظر ))
مثلا " اصوات الطقطقه موب من المساعدات " , " الهوبات مالها دخل " ,"ولا الفحمات "
لان الخراب ممكن "عكوس" , "اذرعه" , " كراسي مكينه"
كذا بيلعب عليك و يقولك غير و انت بتغير وانت مرتاح
0
0
يا اخوان انا عندي جيب لكزس ٢٠١١ ويطلعلي احيانأ صوت طقطقه في المكينه عند التشغيل وماتروح لين امشي
وتطلع والسياره حاره واحيانأ بارده
افيدوني تكفون
طبعأ الصوت طالع من المكينه او من الشداد ما اعرف بالضبط
0
0
0
0
بعدين الواحد يشوفله ناس يتعامل معاهم ويعرفهم ويعرفونه عشان اذا خرب في سيارتة شي يروح لهم ولا يدور غيرهم حتى الفلوس اذا ما عندك تصلح وتعطيهم بعدين لنهم صارو يعرفونك،،،
قبل 11 سنه و 5 شهر